Kiçik və Orta Biznesin İnkişafı Agentliyi (KOBİA) 14-15 oktyabr tarixlərində Bakı Bulvarında (Kukla Teatrının arxası) təşkil ediləcək “KOB Fest” – sərgi-satış yarmarkasına dəvət edir. “KOB Fest” saat 10:00-dan 18:30-dək paytaxt sakinləri və şəhərimizin qonaqları üçün açıq olacaq. Yarmarkada 80-ə yaxın mikro və kiçik sahibkarlıq subyektinin 800-dən çox çeşiddə məhsul və xidmətləri təqdim ediləcək və satılacaq. Sərgi-satış yarmarkasında biznes subyektlərinin istehsal etdikləri bal, şirniyyat məhsulları, kofe, sərinləşdirici içkilər, zəfəran, mürəbbə, əzmələr, sənətkarların və yaradıcı şəxslərin əl işləri, toxuculuq məhsulları, geyimlər, aksessuarlar, dəri və taxtadan suvenirlər, keramika, rəsm əsərləri, kitablar, təhsil və təlim xidmətləri və s. nümayiş olunacaq. 

“KOB Fest”in təşkilində məqsəd mikro və kiçik sahibkarlar tərəfindən istehsal olunan məhsulların satış imkanlarını genişləndirmək, yerli məhsulların tanıdılmasıdır. Festival müddətində mədəni-əyləncəli proqram da təşkil ediləcəkdir.