Beynəlxalq pul köçürmələri sahəsində fəaliyyət göstərən Western Union şirkəti Solana blokçeyni üzərində USDPT adlı yeni stabilkoinin buraxıldığını elan edib. Bu rəqəmsal aktiv ABŞ dollarına indekslənib və şirkətin qlobal ödəniş sistemlərini modernləşdirmək strategiyasının əsas elementi hesab olunur. Yeni stabilkoin Anchorage Digital tərəfindən emissiya edilib və tam şəkildə dollar ehtiyatları ilə təmin olunur. Şirkətin planına görə, USDPT Western Union-un mövcud infrastrukturu ilə inteqrasiya edilərək, agentlər və tərəfdaşlar arasında hesablaşmaların daha sürətli və fasiləsiz aparılmasına imkan yaradacaq.
Western Union rəhbərliyi bildirir ki, bu addımın əsas məqsədi beynəlxalq köçürmələrdə mövcud olan gecikmələri və yüksək xərcləri aradan qaldırmaqdır. Ənənəvi sistemlərdən fərqli olaraq, blokçeyn texnologiyası vasitəsilə əməliyyatlar 24 saat, həftənin 7 günü real vaxt rejimində həyata keçirilə biləcək. Bununla yanaşı, şirkət “Digital Asset Network” adlı yeni bir ekosistem üzərində işləyir. Bu platforma kriptovalyuta cüzdanlarını Western Union-un geniş qlobal şəbəkəsi ilə birləşdirərək istifadəçilərə daha çevik maliyyə xidmətləri təqdim etməyi hədəfləyir. Gələcəkdə USDPT stabilkoininin kriptobirjalarda listinqi və daha geniş istifadə imkanlarının yaradılması da planlaşdırılır.

Bu təşəbbüs Western Union-un ənənəvi maliyyə modelindən çıxaraq rəqəmsal aktivlərə yönəlməsinin açıq göstəricisidir. Şirkət bu addımla həm SWIFT kimi klassik ödəniş sistemlərindən asılılığı azaltmaq, həm də daha ucuz, sürətli və şəffaf əməliyyat mühiti yaratmaq niyyətindədir. Bu layihə təkcə yeni bir stabilkoin buraxılışı deyil, həm də Western Union-un fintech və blokçeyn inteqrasiyasına keçidinin strateji mərhələsidir. Əgər uğurlu olarsa, bu model qlobal pul köçürmələri bazarında ciddi struktur dəyişikliklərinə səbəb ola bilər.

Müəllif: Elnur Quliyev